アイディアブックへ戻る

10 نصائح لازم تعرفهم قبل متشترى أثاث بيتك

اثاث مصر اثاث مصر
編集
写真を追加


10 نصائح لازم تعرفهم قبل متشترى أثاث بيتك


شراء الموبليا عملية مهمة وصعبة وفيه ناس كتير بتحتار علشان معندهمش خبرة في الموضوع ده، بس فيه شويه نصائح لازم تعرفهم هيساعدوك في عملية الاختيار دى:

1. حدد مساحة المكان الأول، المساحة بتتحكم فى نوع الاثاث وحجمه، يعنى المساحة الصغيرة مينفعش معاها الأثاث الكلاسيكي أو اللى فيه شغل كثير، يُفضل الأثاث الحديث «مودرن» علشان بيدى إحساس بالبساطة والإتساع.

2. حط ميزانية للقطع الى عايز تشتريها، علشان متشتريش قطع غالية وتخلص عليها الميزانية وبعدين تكتشف انك لسه مجبتش حاجات كتير. ممكن تنزل تلف فى المعارض او تدور على النت عشان تعرف متوسط الأسعار وتعمل ميزانية مبدئية تشتغل عليها.

3. اسأل عند اكتر من واحد قبل ما تاخد القرار وشوف حاجات كتيرة علشان متشتريش حاجة و تندم بعد كدة لو لقيت حاجة أحسن، ومتخليش تركيزك على اسم اللى بتشترى منه، ركز على الجوده والسعر. واسأل كمان لو فيه شحن لحد البيت عشان متوجعش دماغك في النقل، ده غير تكلفتة.

4. اسأل على الخامات اللى معمول منها العفش، اوض النوم والنيش والدولايب وسطح الترابيزات والمكاتب والسفرة بتصنعوا من الخشب الكونتر، والكونتر يعتبر من الخشب المُصنَع على عكس الزان والموسكى والأرو اخشاب طبيعية. والأنواع الأفضل بالترتيب من وجهة نظرنا (الكونتر الطبقات –وان فريست -- جود وود – وطنية – فنية) ولو خبطت على الخشب ولقيت صوت مكتوم ده دليل على ان الخشب كويس.

5. خشب الرُكن والأنتريهات يفضل يكون زان أحمر، والزان الأحمر الموجود في مصر فيه منه أنواع والأفضل بالترتيب (الروماني - AB - BC- الكلف) ويفضل يكون السمك مش اقل من 4 سم.

6. كثافة السفنج في الركن والأنتريهات كل ما بتزيد كل ما هيزيد المدة اللى ممكن يهبط فيها السفنج، وتقدر تعرف السفنج اللى كثافته عالية لما تضغط عليه بصباعك مش هيسيب مكان وهيرجع بسرعة بعكس السفنج اللى كثاقته قليلة هياخد وقت وهيعلم وفي كل الأحول هتحتاج يكون فوق السفنج طبقة او طبقتين من الفيبر علشان يبقى مُريح. وخلى بالك ان المخدات لازم تكون فيبر 100%.

7. المجرى بتاعت الادراج فيها اكتر من نوع بس المنتشر (المرحلة الواحدة - المرحلتين - السوفت كلوز - رمان بلى ) المرحلة الواحدة الدرج مش بيطلع بكامل حجمه على عكس المرحلتين. اما السوفت كلوز فهو زي المرحلتين بس ممكن تلمسه بس يقفل وكمان بيجي في الأخر ويقفل ببطء لوحده من غير ما يخبط ولا يعمل صوت.

8. سُمك الزجاج ميقلش عن 8 ملي، وبالنسبة للرخام فكل لون بيفرق عن التاني، بس بشكل عام ارخص الأنواع هي الأصفر والرمادي والأحمر المنقط والأفضل منهم هو الأخضر. وافضل نوع رخام هو الأسود المنقط ذهبى او فضى.

9. لو هتعمل حاجة عمولة اتفق على كل حاجة الأول وحاول تشرح اللى انت عايزه بالتفصيل علشان ميحصلش سوء تفاهم بعدين.

10. أخيراً اشترى الحاجات الضرورية لشقتك بس، متجبش حاجات مش هتستخدمها وتعملك زحمة على الفاضى وتحسسك بعدم الراحة.

وخليك فاكر وانت بتشتري انك محتاج جودة وسعر مع بعض مش واحدة على حساب التانية.لو اشتريت موبليا قبل كده احكيلنا عن التجربة دى وقولنا ايه الحاجات اللى اتعلمتها علشان الناس اللى ناوية تشترى تستفيد منك، ولو ملكش تجربة قولنا ايه الحاجات اللى مخوفاك.ولو حد عنده اسألة او عايز يعرف معلومات عن حاجة معينة يقولنا علشان نتكلم عليها المرة اللى جاية ان شاء الله.

أثاث مصر يتمنى لكم التوفيق والنجاح